နာဂစ်မုန်တိုင်းတိုက်ခတ် လိုက်သည့် အတွက် မြန်မာပြည်နိုင်ငံရေး၏ မျက်နှာစာအချို့တို့တွင် ထူးခြားသည့် ပြောင်းလဲမှုများ ဖြစ်ပေါ်ခဲ့ သည်ကို မြန်မာပြည် အရေး လေ့လာသုံးသပ်သူများ သတိထားမိကြသည်။ စစ်အစိုးရ၏ ကယ်ဆယ်ရေး၊ နိုင်ငံ တကာမှပေးသည့် အကူအညီ၊ ပြည်တွင်းမှ ဘာသာရေး အဖွဲ့အစည်းများ၊ လူထုတို့၏ မုန်တိုင်းဒဏ်သင့် ဒုက္ခသည်များအပေါ် ကူညီမှု စသည့် အဖြစ်အပျက်များသည် အခြားနိုင်ငံများနှင့် လုံးဝ ကွဲပြားကာ ကမ္ဘာလူထုက နားလည်ရခက်ခဲသည့် ကိစ္စကြီး တစ်ခုဖြစ်ခဲ့သည်။
မြန်မာနိုင်ငံလို အဖြစ်အပျက်မျိုး မကြုံဘူးခဲ့ကြ။ ပြည်တွင်းစစ်ဖြစ်ပွားနေသည့် ဆူဒန်လိုနိုင်ငံမျိုးမှာ အငတ် ဘေး ဆိုက်ရောက်နေ သည့် ဒုက္ခသည်များကို ကယ်ဆယ်ရန် သူပုန်အုပ်စုများကို ကုလသမဂ္ဂက အချိန်ယူညှိနှိုင်းရသည်ကို ကြုံဘူးကြသော်လည်း ပြည် တွင်းစစ်လည်း မရှိသည့် ဧရာဝတီတိုင်းလို ဒေသကို နိုင်ငံတကာက အကူအညီပေးဖို့အတွက် အခက်အခဲ များစွာ ရှိခဲ့သည်ကို နားလည်ရန်ခက်ခဲခြင်း ဖြစ်သည်။ ထို့ကြောင့်ပင် နာဂစ်မုန်တိုင်းသည် သဘာဝ ဘေးအန္တရာယ် တခုအဖြစ်မှ နိုင်ငံရေး ပြဿနာ တစ်ခု အဖြစ် ပြောင်းလဲ ရှုမြင်ခဲ့ကြခြင်းဖြစ်သည်။
နာဂစ်အရှုံးနဲ့ နာဂစ်အမုန်း
အထင်ရှားဆုံး မျက်နှာစာကတော့ စစ်အစိုးရ၏ ကယ်ဆယ်ရေး နောက်ကျခြင်း၊ နာဂစ်အကူအညီအပေါ် တပ်နှင့် အုပ်ချုပ်ရေး အာဏာပိုင်များ အလွဲသုံးစား လုပ်သည့် သာဓကများစွာကြောင့် ပြည်သူလူထု တရပ်လုံးက နကိုကထက် နအဖ အစိုးရအပေါ် အမုန်းပွားခဲ့ကြသည်။ ဘာကြောင့် မြန်မြန်ဆန်ဆန် မကူညီတာလဲ။ ကိုယ်တိုင် မြန်မြန်ဆန်ဆန် မကူညီလျင်လည်း နိုင်ငံတကာ မှ ကယ်ဆယ်ကူညီရေး အဖွဲ့တွေကို ဘာအကြောင်းကြောင့် အ၀င်မခံတာလဲ ဆိုသည့် အချက်သည် ပြည်သူများအကြား ပဟေဠိ ဆန် သည့် မေးခွန်းဖြစ်ခဲ့သည်။
ဝန်ကြီးချုပ် အပါအ၀င်၊ ၀န်ကြီးများ၊ တိုင်းမှူးများက စစ်ခေါင်းဆောင် ဗိုလ်ချုပ်သန်းရွှေကို အမှန် တကယ် ဖြစ်ပျက်နေသည့် အခြေအနေနှင့် နိုင်ငံတကာက တိုက်တွန်းဖိအားပေးမှုများကို တင်ပြဖို့ အခွင့်မသာ သော ကြောင့် လားဟု ထင်မြင်မှန်းဆချက်များလည်း ရှိသည်ကိုကြားရသည်။ ချင်းမိုင် အခြေစိုက် ဧရာဝတီမဂ္ဂဇင်း အယ်ဒီတာ ဦးအောင်ဇော် ကတော့ ဧရာဝတီတိုင်းသည် စစ်အစိုးရ အပေါ်အာခံသည့် ကရင်သူပုန်နယ်မြေဖြစ်ခဲ့ခြင်း၊ န၀တ လက်ထက်မှာ ပင် လက်နက်ကိုင် တော်လှန်ခဲ့သော ထော်ပိုင်အရေးအခင်း ဖြစ်ခဲ့ခြင်းကြောင့် ဒဏ်ခတ်သည့် အနေဖြင့် နောက်ကျမှ ကယ်ဆယ်ရေး၊ ကူညီရေးကို ဟန်ပြသဘောမျှသာ လုပ်ဆောင်ခဲ့သည်ဟု ကောက်ချက်ချသုံးသပ်ခဲ့သည်။
မည်သည့် အကြောင်းကို အခြေခံသည့် ဖြစ်စေကာမူ လက်တွေ့ အဖြစ်အပျက်မှာ နအဖ အစိုးရ၏ ကယ်ဆယ်ရေး နောက်ကျ ခြင်း၊ အားသွန်ခွန်စိုက် မလုပ်ခြင်း၊ နိုင်ငံတကာမှ ပေးသည့် အကူအညီ ပစည်းများကိုပင် စစ်တပ်နှင့် အာဏာပိုင် အဖွဲ့အစည်း အတွက် ဖြတ်ယူသိမ်းဆည်းခြင်း မှောင်ခို ထုတ်ရောင်းကာ ကိုယ်ကျိုးရှာခြင်း တို့ကို ဒေသခံများကလည်း တွေ့မြင်နေရသည်။ အခြားအရပ်ဒေသမှ လူထုကလည်း ကြားသိရပြီး မကြည့်ရက်နိုင်သည့်အတွက် လူထုအားလုံးက တက်ညီလက်ညီ နိုင်သည့်အင်အား၊ နိုင်သည်ဘက်မှ ၀င်ရောက်ကူညီ နေကြသည်။
ဒီအချက်များကြောင့် နကိုကတည်းက နိုင်ငံရေး အရဆုံးရှုံးနေရာမှ ပိုဆုံးရှုံးခဲ့ခြင်း၊ နိုင်ငံရေး အရကြားနေသူများပါ အစိုးရနှင့် ဆန့်ကျင်ဘက် ရပ်တည်ချက်သို့ ပြောင်းလဲကုန်ကြခြင်း ဖြစ်သည်။ ဤသည်မှာ နအဖ အစိုးရအတွက် နာဂစ်ကပေးသည့် အရှုံးနှင့် အမုန်းများဖြစ်သည်။
နအဖအတွက် နာဂစ်ထက် အရေးပိုကြီးသည့် ဒုက္ခ
အထက်ပါ အချက်တွေသည် ထင်ရှားမြင်သာသည့် အချက်များဖြစ်ပြီး နအဖ ခေါင်းဆောင်များလည်း မသိမရှိမနေ သိရှိကြမည် သာ ဖြစ်သည်။ သူတို့လျှောက်ဖို့ ချမှတ် ထားသည့်လမ်း၊ သူတို့အောင်မြင်နိုင်မည်ဟု ထင်သည့် လမ်းကို ဇွတ်မှိတ် လျှောက်နေ ကြခြင်းကြောင့် မြစ်ဝကျွန်းပေါ် လူထုသိန်းနှင့်ချီ အသက်ဆုံးရှုံးခဲ့သည့် အတွက်ရော အသက်ဘေးမှ လွတ်ခဲ့ပြီး အသင့်စား ခေါက်ဆွဲခြောက် ထုပ်ကို ဟင်းလျာ အဖြစ်လုပ်စားကာ နွေးထွေးစေမည့် အခင်းဘာမှ မရှိသည့် မြေကြီးပေါ်၊ အင်္ဂတေခင်း အပေါ်၊ မိသားစုများနှင့် ဖြစ်သလို အိပ်နေကြရချိန်မှာ နအဖ အစိုးရက မဲဆန္ဒခံယူပွဲအတွက် လူစာရင်းကို အတင်း လိုက်လံ ကောက်ယူခိုင်းနေခဲ့သည်။
အချို့ဒုက္ခသည် များမှာ ဒေသဆိုင်ရာ အာဏာပိုင်အဖွဲ့အစည်းက စာရင်းလိုက်လံကောက်ခိုင်းသည်ကို အကူအညီပေးရန် ကောက်ခံ နေသည်ဟုထင်မှတ်ကာ အကူအညီ ရနိုးမျှော်လင့်ခဲ့ကြသည်။ ဘုန်းကြီးကျောင်းမှ သံဃာများကတော့ အသက် ၁၈ နှစ်ပြည့်ပြီး သူဟု ဆိုကတည်းက သူတို့ဘာအတွက်ကောက်သည်ကို ရိပ်မိသောကြောင့် ဒီလိုအခါမျိုးမှာ အကူအညီပေးဖို့ထက် အခြေခံဥပဒေ ကပိုအရေးကြီးသလား ဟုစိတ်ဆိုးကာ စာရင်းလာကောက်သည့် အစိုးရ၀န်ထမ်းများကို ကျောင်းမှ နှင်ထုတ်ခဲ့ သည့် အဖြစ်လည်း လပွတ္တာမြို့ပေါ်တွင် ဖြစ်ပွားခဲ့သည်။
နာဂစ်မုန်တိုင်းတိုက်ခတ်ပြီးနောက် နှစ်ရက်ဝန်းကျင်မှာ မုန်တိုင်းဒဏ်သင့် မြို့နယ်အချို့သို့ လာရောက်သည့် နအဖ ၀န်ကြီးချုပ် မှာ ဒုက္ခသည်များကို လက်ဗလာဖြင့် အားပေးစကားပြောကာ ထမင်းစားဖို့အရေး၊ နေရေးထိုင်ရေး အတွက်ဘာမှ ထိရောက်စွာ ကူညီမပေးနိုင်ခဲ့ပေ။ မြို့ခံများကသာ တတ်နိုင်သည့် ဘက်မှ ၀င်ရောက် ကူညီခဲ့ကြသည်။
ထို့အတွက်ကြောင့် နာဂစ်အပြီးမှာ လူထုများအကြား "ကျန်းမာရေး ဂရုစိုက်ကြ၊ အခုတစ်ခေါက်တော့ ဘာမှ မပါလာသေးဘူး၊ နောက်တခေါက်လာမှ ယူလာပေးမယ်၊ ကျန်းမာရေး ဂရုစိုက်၊ ခြင်ကိုက်မခံကြနဲ့" ဆိုသည့် ပြက်လုံးကိုပင် ဒေသခံများအကြား ပြက်ကာ ပြောဆိုလျက်ရှိကြသည်။ အဆိုပါစကားမှာ မုန်တိုင်းတိုက်ပြီး ရက်ပိုင်းအကြာ မုန်တိုင်းဒဏ်ခံစားရသည့် မြို့ရွာများသို့ ၀န်ကြီးချုပ် ဗိုလ်ချုပ်ကြီး သိန်းစိန် သွားရောက်ခဲ့စဉ်က ပြောဆိုခဲ့သည့် စကားများ ဖြစ်သည်။
နာဂစ်ကြောင့် လူထုအချင်းချင်းပိုမို နီးစပ်လာခဲ့ပြီး အုပ်ချုပ်သူ နအဖအစိုးရနှင့် ပိုမိုဝေးကွာသွားခဲ့သည်။ နအဖ သည်နိုင်ငံရေး အမြတ်ထုတ်တတ်ခဲ့လျှင် ယခုလို အခွင့်အခါမှာ လူထု၏အားကိုးမှုကိုရအောင် လုပ်နိုင်သည့် အခွင့်အခါ ဖြစ်သည့်အပြင် နိုင်ငံ တကာ၏ အသိအမှတ်ပြုမှုကိုပင် ရယူနိုင်သည့် အခွင့်အလမ်းများ ထွက်ပေါ်ခဲ့သည်။
ပြည်တွင်းမှ ၀ါရင့် သတင်းစာဆရာကြီးတစ်ဦးက " ဒီ နအဖ ခေါင်းဆောင်ဆိုတဲ့သူတွေဟာ သူတို့အတွက် နိုင်ငံရေး အရ အကျိုးအမြတ်ရှိတဲ့ ဟာကိုတောင် မလုပ်တတ်ဘူး၊ အခုလိုနာဂစ်ဖြစ်တဲ့ အချိန်မှာ သူတို့ကို စီးပွားရေး အရပိတ်ဆို့ထား၊ နိုင်ငံ ရေး အရ ဖယ်ကျဉ်ထားတဲ့ နိုင်ငံတကာ အစိုးရတွေနဲ့ တိုက်ရိုက်ဆက်သွယ်ပြီး ပုံမှန်ဆက်ဆံမှုမျိုးကို ရယူနိုင်ရင် အန်အယ်လ်ဒီ ပါတီ တောင် ဘေးရောက်သလို ဖြစ်သွားမယ်၊ ဒီလိုနိုင်ငံရေး အကွက်ကိုတောင် နားမလည်တဲ့ စစ်ခေါင်းဆောင်တွေ" ဟု သုံးသပ် ပြော ဆိုသည်။
သံဃာ့ ဦးဆောင်မှု နှင့် လူမှုရေး အဖွဲ့အစည်းများ ကဏ္ဍကျယ်ပြန့်လာခြင်း
မေလ နာဂစ်မုန်တိုင်း တိုက်ခတ်လိုက်သည့် အခါ တိုင်းပြည်၏ အင်အားစုအသီးသီးကို မှတ်ကျောက်တင်လိုက် သလိုဖြစ် ခဲ့သည်။ တရုတ်ပြည် စီချွမ်ပြည်နယ်တွင် လှုပ်ခဲ့သည့် ငလျင်သာ အရင်ကျခဲ့လျင် နအဖက သူ့၏ ဆရာ ဖြစ်သည့် တရုတ်နိုင်ငံ ကို နမူနာ ယူကာ လိုက်လုပ်မည်လားဟု အချို့လေ့လာသူများက တွေးဆကြသည်။ ယခုတော့ မြန်မာနိုင်ငံမုန်တိုင်းက အရင် တိုက်ခတ်ခဲ့ပြီးမှ တရုတ်ငလျင်က လှုပ်ခဲ့သည်။
တရုတ်နိုင်ငံက နိုင်ငံတကာ အကူအညီတွေကို ဖိတ်ခေါ်ကာ အကူအညီလည်းယူ၊ တရုတ်-အမေရိကန် ဆက်ဆံရေး ကိုပါ ပိုပြီး ကောင်းမွန်အောင် နိုင်ငံရေး အမြတ်ထုတ်ယူနိုင်ခဲ့သော်လည်း မြန်မာ နအဖ အစိုးရကမူ ကမ္ဘာ့အလယ်မှာ လူသားချင်းချင်း ကယ် ဆယ်ခွင့် မပေးသည့် ရာဇ၀တ်မှုဟု ကမ္ဘာ့ခေါင်းဆောင်အချို့က ကင်မွန်းတပ်ခဲ့ရအောင် သိက္ခာကျခဲ့ရသည်။
ထင်ရှားသည့် ဆရာတော်များ ရော မထင်ရှားသည့် ကျေးရွာရပ်ကွက်များမှ ဆရာတော် သံဃာများပါ ကယ်ဆယ်ရေး၊ ကူညီရေးတွင် ကိုယ်ဖိရင်ဖိ ၀င်ရောက် ဆောင်ရွက်နေကြသည့် အပြင် သံဃာတော်များနှင့် လူထု၊ သံဃာတော်များနှင့် အကူအညီ ပေးရေး အဖွဲ့များ၊ အခြား လူထုအဖွဲ့အစည်းများကလည်း သံဃာတော်များကို ၀ိုင်းဝန်းပံ့ပိုးပေးခဲ့ကြသည်။ ဘာသာကွဲများထဲကပင် သံဃာတော်များ လုပ်ဆောင်သည့် ကယ်ဆယ်ရေး၊ ကူညီရေးကို ၀ိုင်းဝန်းထောက်ခံခဲ့ကြသည်။ ယခုလိုအချိန်မှာ ဘာသာရေး၊ နိုင်ငံရေး၊ ယုံကြည်ချက် တို့ကိုဘေးဖယ်ထားပြီး လူသားအချင်းချင်း ကူညီဖို့ဆိုသည် အချက်တစ်ခုကိုသာအာရုံစိုက် နားလည်နိုင် ကြသည်ကို တွေ့ရသည်။
မေလ ၂၅ရက်နေ့က စင်္ကာပူနိုင်ငံသို့ သီတဂူဆရာတော် မုန်တိုင်းဒဏ်သင့် ဒုက္ခသည်များအတွက် အလှူခံ တရားဟောစဉ်မှာ "နိုင်ငံရေး ရပ်တည်ချက်ကနေကြည့်မနေပါနဲ့၊ လူမျိုးရေးရှုထောင့်ကလည်း ကြည့်မနေပါနဲ့၊ ဘာသာရေး ရှုထောင့်ကလည်း ကြည့်မနေပါနဲ့ ကရုဏာ ရှုဒေါင့်ကနေကြည့်ပြီး ဒုက္ခရောက်နေတဲ့ သူတွေကို ကူညီဖို့ ကရုဏာ ဘုံလမ်းကြောင်း တစ်ခုချပါ" လို့ဆော်သြခဲ့ပါတယ်။
ယခုလို အချိန်မှာ ပါဝင် ကူညီသူ အားလုံး ဘုံအရေးဖြစ်တဲ့ ကယ်ဆယ်ရေး၊ ကူညီရေးမှာ သာအာရုံးစိုက်ထားကြပါတယ်။ သို့ပေမယ့် အဲဒီ ခံစားမှုများရဲ့ နောက်ကွယ်ဝယ် နိုင်ငံရေး အရ ဖြစ်တည် ပြောင်းလဲမှုတစ်ခု ကတော့ နာဂစ်လွန်ကာလမှာ အမှန် တကယ် ဖြစ်ပေါ်နေပြီလို့ မြန်မာနိုင်ငံမှ လူတွေ ခံစားနားလည်နေကြပါတယ်။
ကျော်သစ်နိုင် (ရန်ကုန်မြို့မှ ပေးပို့သည်။)
ရွက်မွန်မှ ကူးယူဖေါ်ပြသည်။
ဤပို့စ်ရဲ့အပေါ်ထင်မြင်သုံးသပ်ချက်
Print this post
0 comments:
Post a Comment